मिलौ जिलौ रंगिना-संगिना
गोदो गोदो सिमांनिफ्राय
जेब्ला आं सिरि मोनो,
फुंनि हांसो सिलारिया बिरबोब्ला
गां फुवार फुवार आंनि बिन्दोआव,
गोजावबोयो नीलुनि गारां-
‘ गोसो खांनाय सोलोँनायाव
बावलाङा नोँनि गोसो
गोसोनि दाहा दैमायाव
दिना थांदोँ हालो दैलो
दाहाया आंनि गोजावबोदोँ दैलो दैलो’
सानसुनि सिरियाव आलि दानै दानै
आलि खोयै खोयै मेँहाबब्ला
बैग्रि बिफांनि सिंङाव गोलांब्ला
गोजाव बोयो नीलुनि मेथाइ-
‘ बिफांआव बानानै बिखा फोजा फोजा
जुगु जुगु दाउथु गाबदोँ-‘
हार्सिँङै सिरियै आलां मालां
बेलासि बेलारोम सुदेम बाराव
जोमै नायदाव नायदाव लामायाव
जेब्ला आं आगान होयो
गोजाव बोयो नीलुनि मेथाइ-
‘ मोनहां मोनहांयैनो मोननो थाङा-
नुहां नुहांयै नुनो थाङा
सोरो मोनो जिउनि सोरो मोनो-
सोरो मोनो
नुजाफै आंनि आलावरि गोसोनि रोजाबनायाव’
मोनाबिलि मोनाबिलि जेब्ला
आं न’फारसे गिदिँबोफिनो
दान्दिसे सिलायाव जिरायब्ला
अब्लाबो गारां खोमायाव-
‘ मोनाबिलियाव अखाफोर दानसोरां
हार्सिँङै जहाब जहाब
गोमोरलांनाय अनसायनायाव
नोँनि महरा गोजावखांबोला
जिउ फैफिनगौ आं मोखांनि संसाराव’
सानसे थांबाय दिनै
गोजावनाय गोदोनाय सानस्रियाव सोलेर
सानस्रि सानस्रि बारनबोबाय,
आङो हिसाब खालामना समनि,
बै समनि बुब्लिखौ-
हरनि एमाव गोलांब्ला
रोमै रोमै खोनाफैयो देँखो-
‘ अख्रांनि अखाफोर जानानै आं
बिबार नोँ बिलोआव बारनानै
आय’ गेलेदिनि गोजोन गेलेदिनि
बिलो मोनसेयावनो थालायदिनि
नुजाफै आंनि आलावरि गोसोनि रोजाबनायाव’
गोदो गोदो उन्दुलांब्लाबो
आङो सिमां नुयो नीलु
नोँनि बोराय बैसोनि सम,
नोँनि गोलाव गोलाव थाबायनाय
नोँनि जौसांआव बालाबगासे देँखो हगारनाय।
आं सिरि मोनो
आं सिरि मोनो मोकथांआव
नै अब्लाबो मेथाइ
देँखो फाग्ला नीलुनि मेथाइ-
‘ हनै सानजाहा
सोरां साना फैगौ
हनै सानजाहा सोरां बोगौ।’
You May Also Like:
- सियालनि हाबायाव दान्दिसे
- निनिमा (1) : एसे बोरायदब दारि जामाव माव
- निनिमा (2) : जोबोद खुसिजोँ बोराय दाम्बुआ बुङो
- निनिमा (3) : नोगोर शहराव देरनायब्लाबो
- आं बिबायारि नङा जुजियारिसो
- निनिमा (4) : अखानायै बिलिया दाम्बुनि सिगाङाव बुंदोँमोन
- निनिमा (5) : उनाव फिसाज्ला सासेखौ
- निनिमा (6) : लाद्रा-लाद्रि मेगननिफ्राय
Leave a Reply