थेबगां सोलेरनि बान्दा
आं बिबायारि नङा,
उखैनायखौ सहाय हायै
लोरबां गोसोनि सुथुरसो।
रोनावनायखौ खनखांनानै
फबगारना दोननो हा सिंङाव,
इडेननि मोदोमफ्रु बारियाव
थं गसंना नायहाबनो
आं जुजियारिसो।
गाथे गाथे सोलेरनि रागाखौ
औवा हासुंआव माथेनो,
उवाल-गायहेनजोँ सौग्लिनानै
अनला ओंख्रियाव गारसननो
आं जुजियारिसो।
मिनिनायखौ आं बियाखै
रंजानायखौबो आं मागियाखै
अदेबानि आं गाबनोसो जुजिदोँ
मोदै फसरनो दुखु-दाहा रुजुन्नानै।
लाजिनायजोँ आं जुजिगोन
गिनायजोँ आं जुजिगोन
मेगन-खोमा-गन्थं
खुगा-आथिँ-आखायजोँआं जुजिगोन आं जुजिगोन।
आं रागाजोँ जुजिगोन
आं उखैनायजोँ जुजिगोन
आं दुखुजोँ जुजिगोन
आं रंजानायजोँ जुजिगोन।
देरहानायखौ आं बियाखै
गोहो-बोलो-सोलो
गियान-सोरां-आर’ज
आं मागियाखै,
आं बिबायारि नङा।
आं खारनो जुजिगोन
आं थांना थानो जुजिगोन
आं अख्रांजोँ जुजिगोन
आं लैथोजोँ जुजिगोन
आं बारजोँ जुजिगोन
आं बिसोरजोँ जुजिगोन
जाय आंनि गासैबो सुथुर
मुलुगनि गासैजोँबो जुजिनानै
थांफिन्नो आं लुबैयो
गोजोन नावआव गाखोनानै।
You May Also Like:
- सियालनि हाबायाव दान्दिसे
- निनिमा (1) : एसे बोरायदब दारि जामाव माव
- निनिमा (2) : जोबोद खुसिजोँ बोराय दाम्बुआ बुङो
- निनिमा (3) : नोगोर शहराव देरनायब्लाबो
- निनिमा (4) : अखानायै बिलिया दाम्बुनि सिगाङाव बुंदोँमोन
- निनिमा (5) : उनाव फिसाज्ला सासेखौ
- निनिमा (6) : लाद्रा-लाद्रि मेगननिफ्राय
- निनिमा (7) : बेबादि हालोदखौ नुनानै रांखोआ
Leave a Reply