આજ ફાગણને ફાગ, રૂમઝૂમતી રમવા નીસરી,
રમવા નીસરી દુ:ખડાં વીસરી રે.
આજ ગલને ગુલાલ છાંટતી રમવા નીસરી,
રમવા નીસરી મુખ રાતાં કરી રે.
આજ કેસૂડા ડાળ, રંગરેલી રમવા નીસરી,
રમવા નીસરી પટકુલ કેસરી રે.
આજ પૂનમને આભ, અનહદમાં રમવા નીસરી,
રમવા નીસરી ઉર ચાંદો ધરી રે.
આજ સોળે શણગાર શોભંતી રમવા નીસરી,
રમવા નીસરી સુખભર સુંદરી રે.
આજ વનદેવી નાર, નવખંડે રમવા નીસરી,
રમવા નીસરી વિભુની ઈશ્વરી રે.
Leave a Reply