जेब्ला आं आरो माखासे मानि
दंमोन टि.भि.नि मोखांआव जिरायना,
अब्ला नों बिमानि अनजालि फिसाया,
जीटिभिआव दा नुजाफैदोंमोन।
सुबुंफोरा आखाय खबस्रावदों,
मिथिस्लाबै आंनि मोदोमा गोजांस्रिव मोन्दों
मेगनाव थरथिंनैसो मोदै ज्राम-ज्राम;
नाथाइ बै गोजांस्रिवनाय आरो मोदैया,
ओंखारदों नों अनसुलि बिमानि नाजानाय
आरो नोंनि अनजालि फिसानि मावसोमनायाव,
सुख’स हायै खुसिनि रंजानायाव।
नों सासे गोहोथि बिमा-
नोंनि अनसायनाय आरो मददाव,
नों, नोंनि फिसा, न’खर आरो हारि-हादर
बेसेदि अनसायजादों आरो मिथिजादों।
नाथाइ बुबायल’, बाखोनायबायल’
नों आरो नोंनि फिसाखौ;
हायासै होनो नोंसोरनि आखाइआव
माबा मुवा-बेसाद।
गोर्बोआ सानबायल’-
दोंसे खन्थाइजोंनो
आंनि मोजां मोननाय, खुलुमनाय, साबायखरनाय
गासैखौबो जासिहरनो।
थुलुंगानि बिमा नों बर’नि!
हारिनि उन्दुसिनाय मेगन थाइनैखौ
होबाय नों दिनै एसे बोदलाना,
नुनो मोनबाय हारिया,
दिनै, आरो जों एसेबां खाना नंलिया।
गोर्बोआ बुंथिनो थिनो-
नोंसोर हारिनि अलंबार,
हारिनि खोमसि अख्रांआव जोंथिना
हारिनि सिदलायाव सोरां लाबोबाय!
बर’नि सिदलाखौ स्रां खालामबाय! !
सासे बर’ बिमानो
Did you enjoy the the artible “सासे बर’ बिमानो” from Bidindra Basumatary on OZOFE.COM? Do you know anyone who could enjoy it as much as you do? If so, don't hesitate to share this post to them and your other beloved ones.
Leave a Reply