देलाय मालाय बालेँलेँ
हायना गोनां लाइमोन फुंबिलि
सानसेनि थाखाय नोङो दान्दिसेल’।
जारौ मिनि खैरोरो लाजिसुलु
नोँ आंखौ गोसो थोबाय
नोङो आंखौ, आंनि गोसोखौ
गलि होबाय दुंखाव होबाय
नाथाय सानसुलि सना-
आंनि थांना थासान्दि थोँबो दान्दिसे।
आङो दान्दिसे थाबाय थाबाय मेंग्लिबा
बैग्रि एबा थायलाद’ सायायाव जिरायबा
नोँ आंखौ गोजोन होयो
अब्ला आं नोँखौ मोजां मोनो
नागारनो हायै बादि;
नाथाय बेलारोम सिखोला-
नोँबो आंखौ गारना खारो।
जेब्ला दुगैयै लोबै
मोदोमफ्रु देलायना बेरायग्लाङो
माब्लाबा आंहा बिखायाव हांमा
माब्लाबा लाख’हायै रंजानाय
हाबाब मा इसे मोजां मोन्नाय
मोनाबिलि सना!
बिलिर बिलिर नोङो खुदुमो
अहाया अहाया गोबायो।
नाथाय आंनि लोगो
बिलिफांआ लिँहरब्ला
आं नोँखौबो गारनाङो
नोँबो आंखौ बिदायहरो
खोमसियाव आखाय सोमाव सोमाव
आं नायहरस्लाब मोना बेखौबो।
गावसिनाव आलासि जानो लेँनानै
जाहोयै लोँहोयै आंखौ फुथुयो
आंबो उन्दुनाङो एम गोबा गोबा
नाथाय खोमसि सिख्लाया आंखौ…..
बियो आंखौ सिमां फारसे बोलाङो
गुसु सुदेम बिबार बारियाव,
सोर्गो-नोरोक-फाथाल
जोँ सानैजोँ बेरायो।
नाथाय सिमांआबो दान्दिसेल’
हरसेनि गेजेरावनो,
अब्ला आं गोसो खाङो
बै समनि-
फुंबिलि-सानसुलि-बेलास्रि-मोनाबिलि
आरो आंनि लोगो बिलिफांखौ
बिनि बिनानाव खोमसि सिख्लाखौ।
You May Also Like:
- सियालनि हाबायाव दान्दिसे
- निनिमा (1) : एसे बोरायदब दारि जामाव माव
- निनिमा (2) : जोबोद खुसिजोँ बोराय दाम्बुआ बुङो
- निनिमा (3) : नोगोर शहराव देरनायब्लाबो
- आं बिबायारि नङा जुजियारिसो
- निनिमा (4) : अखानायै बिलिया दाम्बुनि सिगाङाव बुंदोँमोन
- निनिमा (5) : उनाव फिसाज्ला सासेखौ
- निनिमा (6) : लाद्रा-लाद्रि मेगननिफ्राय
Leave a Reply