फंबाय बिदिन्द्रनो

फंबाय, नोँ थुनलाइ बिजिरनायखौ फरायबाय?
आरो थुनलाइनि जिउआव (बर’नि)
हुरा हुरा गाबनाय मिनिनाय नुदोँथ’-
नाथाय नुगोन बांसिन उखैनाय।
फंबाय, नोँनि मिजिँआ बेसे गोथौ
एबा मिजिँ फैसालिया बेसे गुवार
आं मिथिनाय नङा,
थेवबो आं मिथिगौ फंबाय
गोफार नोँनि मिजिँखौ
मिजिँनि गोगो दाहारखौसो।
फंबाय, दैज्लांनि आजै आजौ दुब्लियाव
हालेवनाय, आलि दान्नाय-खोनाय
सानदुं अखा सानफामानि
रानथाब सिग्लाब थोथोर-बोथोर
आंबो लोरला जालांथारदोँमोन
रेबगन दैनो हायै आखाय जामब्रिहाबदोँमोन।
आं खन्थाइगिरि नङा
नाथाय आं खन्थाइ लिरो,
लिरगासिनो लिरो फंबाय
लिरबाय थागोनबो-
गोसोआ जेसेबां सम थांना थायो।
फंबाय, सानसेखालि आं जेब्ला खोमसियै
हंख्रद लायजासे उन्दुब्ला
नोँथ’ आंनि खिला फांथेयै
गोसोनि फर्दाखौ बोलाफैदोँमोन,
बेजोंनो आं सिरिमोन्दोँ,
नोँनि आगाननि खबामाबो खम नङा फंबाय
सिरि मोन्दोँ आं हरखाबनो।
नाथाय फंबाय आंबोथ’ जोहोलावसो
दावहा गारना खारबोनांनाय
खोमसि फुरिनिफ्राय।
सानसेनि उनाव सानसे
गायदोँ फुलि हासारबो होदोँ
गेरेमसा खालामनायाबो नोँनिनो बिबान,
फंबाय आंखौबोथ’ लेंफैदोँ नोङो नङा?
नोङो सिमान जागोन फंबाय
बुंगारनोबो हागौ गोगोमै
‘ बिफांखौ आंनि थाखाय आं गायाखै
दुलाराय सुबुंनि एबा मुलुगनि थाखायसो,
जायनि सायाखौ आंनो मोनबाय थाया।’
जोँनि थुनलाइ बाख्रिया दं
नाथाय थुनलाइनि सोदोबा गोमादोँ,
अब्ला थुनलाइनि बाख्रिया खंख्ला बुंनांगोन
थुनलाइनि उखैनाय सोदोब नागिरनांगोन।
सानसे नोँ बुंब्ला आं खोनासंदोँ फंबाय
‘ बर’ थुनलाइनि बाख्रिखौ
आबुं खालामनाया जोँनि बिबान।’
जेबो राहा गैया आंहा
फंबाय अनथाव बाथाव नोँनि
हाबिलाखौ आं सिमा बोनो हाया,
आं बुंनो गोनां जादोँमोन अब्ला
आखाय सिफाय सिफाय
‘ नंगौ बिबाना आंहाबो दं।
आंबो रुजुनगोन।’
थेवबो थेवबो आं सोर्गो नागिरो
रंजालि सोर्गोस्रि सिख्लाफोरजोँ
जोमै जोमै बिरबायनो,
नाथाय फंबाय नोङो आंखौ हमथारो
जोमैजोँ बिरलांना बहा थांनो?
बुरलुंबुथुराव गोग्लैहैना
बख्रबाव फबजाहैब्ला आद्रि आद्रि?
नोँखौ बावहाबना थायो आं
नाथाय नोङो दादा नुजाफैयो
जेब्ला नोँ बुंफैयो-
‘ गोजोन फुंबिलि आदा!
एबा गुड् मर्णिँ आदा होन्ना।’
नोँ हाथियार फंबाय
(दानि बेलेष्टिक मिशाइल नंगौदा)
गोगो सानस्रिनि मोनसे रोदा,
खिलिनाय बिलाइ गोरलै
(जायनिफ्राइ थरथिँफ्रोम निहोर
एबा गोगो अखायानो
खबाम गोनां बाज्रुमो)
बाखोनाय गारबाय आं,
मानोना आंहा नोँनो होनो
जेबो गैजारोङा फंबाय।